番仔火盒的收藏
番仔火盒的收藏，主要是番仔火盒頂懸的標頭圖樣。一般人恐驚是較毋知，番仔火盒的收藏是世界四大平面收藏品之一。----其他三个是郵票，薰盒標頭佮酒矸標頭。
咱台灣佇1950-1980年代是有濟濟的人收集番仔火盒標頭。較早台灣較普遍的番仔火盒標頭，蔣敏全先生是按呢回想的：
「基隆是狗頭牌火柴，台北Paradise，台中是『自由之火』（即一般人攏知影的台火火炬商標）；台南勝利火柴公司是猴標火柴」
頂工去台灣火柴故事館的時陣，對志工的口中才知影，有真濟人共伊的番仔火盒的收藏品提來寄付（kià-hù）予火柴故事館。這嘛是好事一層。你費誠濟心思，費一生的歲月當做寶的收藏就會當予較濟人看著。希望有收集的番仔火盒會當多多寄付予火柴故事館，予伊愈來愈充實。
台灣的番仔火盒的收藏家：
蔣敏全先生：
蔣敏全的父親蔣瓊輝，1949年起佇台灣火柴公司做工課，對造型特殊的番 仔火盒得別佮意，留予伊一千幾盒無仝造型的番仔火盒。蔣敏全收集四十幾年，收集有八千偌盒番仔火盒。
蔣先生共伊的番仔火盒收集品提供予「台灣火柴故事館」展示。
盧坤祺先生
伊父親任職台灣火柴公司，盧坤祺自小學一年級開始收集番仔火盒，累積的 收集數量達到二千多個。伊的收藏品捌佇1998年佇美國文化中心展示「火柴 世界的今昔--盧坤祺收藏展」。
伊閣有有出一本冊「一支番仔火 點亮台灣一甲子：從火柴盒看近代史」嘛是一个見證。
孟繁興先生
90幾歲的新竹市榮民孟繁興先生自早佮意收集番仔火盒，收集超
過 3000個番仔火盒，2018 年捌佇在眷村博物館舉辦火柴盒展。
唐鎮宇先生
基隆市唐鎮宇先生的收藏，是因為伊的父親任職佇番仔火公司。
2018年 有佇基隆市文化局主辦的「懷舊火柴盒收藏展」。
張良澤先生
台灣作家，自費出版「日本火柴盒圖錄（1966年~1970年）」。
嘛是一个見證。
番仔火盒收藏雖罔是列入世界4大平面收藏。毋過，番仔火是欲消
失的物件。現此時毋但台灣是已經無生產，連賣的所在嘛是惡揣。
可能有一寡少年人恐驚嘛毋知有番仔火這項物件。
按呢照講，以「稀少性」來看，番仔火盒收藏品應該真有價值才
著，不而過，毋捌聽講有佗一个番仔火盒賣足懸的價數。連線頂的
番仔火盒收藏品的買賣嘛無濟。就莫講親像一張罕有（稀少）的郵票有幾十萬美金的價值。
我是認為番仔火的價數低，標頭的設計就無遐爾講究，商店企業共番仔火盒當做贈送品，就無下真濟成本設計標頭，藝術上的價值就較少。雖罔高雄大新百貨佇1973年印的番仔火盒，一套六盒，是用故宮郎世寧名畫「百駿圖」，這嘛是少數。
毋過，收藏是一項真好的慣勢，彼需要專注力佮耐力，也是人生的一種記 錄。番仔火盒的收藏應該是過去的代誌，毋過，收藏是一種真好的興趣，建議逐家揣一个適合家己的收藏。
我家己佇1970～80年代嘛是有加減收集，猶毋過干焦是三七五的水準爾爾。佇整理的過程回想著家己人生路途的跤跡，嘛是人生的一種快樂。翕規張相佮逐家分享。
後記：頂一站為欲寫番仔火的小文收集一寡資料。內底有番仔火盒收藏的資料就共整理出來做一个記錄。（Tong-îng230418）
文章定位：
