向詩人林亨泰老師致敬＠Tong-îng 的台語時間

2023-11-19 17:11:45| 人氣10| 回應0 | 上一篇 | 下一篇

頂禮拜才參加阮高三導師的告別式。今仔日聽著高一教阮英文的林亨泰老師過身去。啊！

1965年阮高一的，會記得是佇一樓的教室，林老師攏是惦惦仔行入教室，用勻勻仔，平平的話語講課。

講實在的，我袂記得有認真聽課無？只是會記得有這位老師。彼个時陣嘛毋知伊是作家，是有名的詩人。

本成家己就愛看冊，學生時代無錢買冊就對圖書館借來看。入社會就家己買冊看，行冊店就變成慣勢。到了1980年代，開始看日本話的冊，就較捷去當時專門賣日文冊的台中「文明書局」。

有一擺佇「文明」附近拄著林老師，我就自我介紹。後來就開始注意林老師，才知影伊佇詩界遐爾有名。後來得著第8屆「國家文藝獎」（2004），40屆吳三連獎的文學獎（2017）。伊得著吳三連獎的時，我猶佇FB寫一篇文，ka̋ng展講伊是我的老師。

講著「文明書局」就會予我連想就親像林老師這代，是經過〔改朝換代〕的身、心痛苦的一代。

干焦講著一个暗暝就愛改用完全毋捌的語言，閣是作家，就愛用完全毋捌的語言「寫作」？就知影偌艱苦矣，彼種艱苦應該是真難用文字表現。

𪜶彼代的智識人母語是日本話，1970-80年代台中有賣日本冊的冊店無幾間，「文明書局」，「中央書局」攏有賣。「文明」的是冊上濟，「中央」嘛袂少，毋過無「文明」遐爾濟。後來我才知影「文明」「中央」這兩間書局，是這代智識人的「精神食糧補給所」。就是按呢我才會有機會拄著林老師。

頂一站仔，過身的翻譯家林文月先生嘛是仝這代的人，我有寫一篇「向翻譯家林文月先生致敬」（2023.6.5）懷念。

今仔日我就寫一屑屑仔佮林老師的記持，來懷念。

林亨泰老師　ご冥福をお祈り申し上げます。敬請安息。

（2023.9.24 Tongîng）

我要檢舉

台長： Tong-îng Lîm

人氣(10) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫)

回應(0)

Tong-îng 的台語時間 0愛的鼓勵 0訂閱站台