台中舊城區的記持
台中舊城區的繁華，予時代的跤步是踢甲倒佇塗跤，死死昏昏去，欲peh就peh袂起來矣。
（阮講的台中舊城區是指台中車頭往西到第二市仔，北爿到台中公園。南爿到法院的這箍圍仔。就是較早台中的鬧熱區。）
台中舊城區，這馬已經毋是台中人生活的所在，是去懷想的所在。
我的台中舊城區的記持是佇1960年代到1980年代。
會記得讀初中的時，阿母佇平等街的澄清病院入院。 阮攏是對南王田坐公路局的到台中車頭落車。對中正路行到平等街的澄清。沿路的店頭，路邊的擔仔是排甲滿滿是，電火是光焱焱，人是洘秫秫（khó-tsu̍t-tsu̍t）。猶會記得行到綠川橋頭，一擔水果擔招我買西瓜。想起來是目屎滴。當時14歲的囡仔，人是誠喙焦，西瓜食落去是心涼脾肚開。毋過橐袋仔只有轉去的車錢，阿母咧蹛院，嘛無彼款心情。
過年的時，捌佮庄裡的囡仔到台中舊城區，人𤲍人，到綜合大樓第10樓看一箍銀的電影，閣會當連看、看共懶（lán）。50幾年後的這馬，猶會記得彼齣電影叫做「難忘的鳳凰橋」。內底的：落朦朦仔雨、男女主角相見的一幕，猶會佇腦中浮出來。
80年代會𤆬家族去，踅百貨公司、買物件。會去漩石樓（鑽石樓）、大大茶樓食「飲茶」，罕罕仔會去食市府路的「紅地毯」，食貴參參的鐵板燒。
遠東百貨、吉本百貨、永崎百貨、財神百貨、龍心百貨、三商百貨…..(閣有較早的千越百貨)
囡仔愛去的麥當勞——閣有車頭前，公園前兩間咧。溫蒂漢堡 頂瓜瓜----
綠洲大飯店、金國大飯店、台中大飯店、敬華大飯店、藍天大飯店、後引大飯店、富春大飯店、西北大飯店…..
日本料理的水車、後引（A-to-bi-ki），大三元，波士頓西餐廳，西北西餐廳-------
台中名產「太陽餅」是四界攏袂會著。毋過，會當看著台灣前輩畫家顏水龍的「太陽花壁畫」、彼間自由路二段23號「太陽堂」，早就無做，大門關牢咧矣。
較早講欲創一个「台中的光華商場」、「台中的Akihabara(秋葉原)」的「繼光電子街」，曷這馬咧？頂一工，我猶駛車軁過繼光街咧！
這馬的台中舊城區，綠川是有創較好矣，嘛有一寡仔親像宮原眼科、四信這款的「觀光」的所在。（阮是講：去宮原眼科毋是看目睭，四信袂當寄錢）看著的人攏是外口來的。
這馬的台中舊城區，歇睏日是真鬧熱、人誠濟，毋閣攏毋是台中人，攏是外國來的、離鄉背井來拍拚趁錢的人。第一市仔變成「移工的岫」。其他的日子，人講「小貓兩三隻」，人是足少矣。連貓仔、狗仔就罕得拄著。
這馬的台中舊城區，已經毋是台中人生活的所在，是去懷想的所在。
這馬的台中人欲買物件，欲踅街，會去新光遠百，Sogo。少年的會相招去中友。 欲食飯，會去五權西三街。這馬閣有一間新的LaLaPort，欲買物件、欲踅街、欲食飯就One stop shop，佇遮攏解決。
照講是愛代先起的藍線（台中車頭軁過台中舊城區的東西線），到今猶未動工！
台中舊城區欲閣恢復日的繁華，是等捷運？是咧等啥？欲等甲當時？
當然官民是有一寡仔有心人士，用心咧拍拚看，欲按怎恢復過去的繁華。路猶是躼躼長，咱就毋通失志，一跤步一跤印做伙拚落去。
若無，台中舊城區毋但是死死昏昏去，𬦰袂起來爾爾，恐驚就殗殗袂消胘（giān-giān bē siau-kiān），死胘胘喔！
（20231006Tong-îng 鈴蘭通散步納涼會有感）
文章定位：
