回歸齊上街 遊行示威表訴求展共識
民主新
原載於〔澳門勞動報〕第七期 11.21.2007
今年四月三日，五一遊行正在酝釀當中，行政長官為求為五一遊行減壓係立法會答問大會上拋出所謂「何九招」，其中一招係將養老金發放年齡調低到六十歲。呢個係一班長者或者準長者爭取多年的訴求。
行政長官在答問大會上回應議員質詢中表明：「特區政府是決定是將社保的問題在今年裏面是全面評估以及去解決的。解決的方案，首先我們是接納了社會意見，是將這個六十歲，這個下調我們是接受的。在這個前提我知道主要的意見還是就是六十歲是退了休沒有工作做的，這個作為一個前提標準。」政府會「填補適當的資金，達到一個合理的金額能令到我們將來六十歲的澳門居民，他只要不工作，就會有一個合理的生活保障。」（行政長官原話照錄）
長者們正苦候行政長官落實承諾，吓，點知社工局局長葉炳權早排係一個公開場合的透露：「養老金發放年齡是否下降至六十歲，仍在經濟財政司司長範圍研究當中，未有定案。」唔係啩，特首明明公開表示會接納民間意見下調養老金發放年齡，但轉頭又話未定案，又話仲係司長研究範圍當中。係唔係玩Ｄ老人家呀？行政長官在立法會向全體議員、向全澳公眾宣佈的，原來竟未有定案。行政長官說話到底算不算數呢？
局長仲過癮，佢話全世界都因為人的壽命普遍延長，將退休年齡推高，仲話係世界潮流添。但係澳門就反而要下調退休年齡。局長潛台詞即係話咁唔啱。在局長角度嚟睇，佢認為係因為澳門近年的經濟有極大的增長，庫房充足，所以好多長者就乜野都唔做，淨係想坐係度收退休金。而特區政府亦因應這一現實考慮下調養老金發放年齡，學行政長官話齋，「大家想分錢，都係好正常。」
但係，以民主新話，呢種諗法可以用三個字嚟形容，就係「食塞米」。
係，澳門的經濟近年有好大增長，但唔少市民係呢個經濟大潮中不單止未能分享經濟成果，反而因為經濟發展的畸型偏向而飽受其害，生活質素一日衰過一日。而重災區就係五六十歲呢一群中壯年人士。係呢個年齡群，本來係澳門人口最多的一部份，而經濟發展所渴求的人力資源卻是在二十多歲到四十歲之間，呢個又啱啱係澳門人口最少的一部份。因為呢個人力資源的錯配，導致人力資源緊缺的同時，卻有大批中壯年人士無法獲得工作，或開工不足、或在職貧窮，甚至被逼提早退休。
所以，澳門社會普遍要求將領養老金年齡下調至六十歲，並非因為眼見政府庫房充裕便「大家拿」，而是呢一個年齡層的長者因為被邊緣化，原來份工一有乜依郁，就好難再就業而被逼失業，講得好聽Ｄ就叫做提早退休。而專責為社會弱勢社群提供支援的局長，竟然認為市民要求將養老金年齡下調係趁政府有錢而搏大霧，真係俾佢吹脹。佢又唔知養老金俾個一千四百五十蚊，真係要靠佢養老的話，肯定係臨老唔過得世。正如一位長者所講，若社會健康，可以俾佢哋有一份能維持尊嚴生活的工作，誰希罕你政府那筆無法養老的「養老金」。
而且根據資料顯示，本澳六十五歲以上之長者，在過去有參與社保基金供款的僅佔三分之一，而其餘三分之二都因為屬家庭主婦或當年工作時不受社保基金所涵蓋而無法獲養老金的保障。政府對此一群體，除了每月俾個一百五十蚊，每日五蚊連買生果都唔夠的所謂長者津貼之外，有否考慮給予更多的一般性支援，例如若屬沒養老金可領的話，可否將長者津貼上調至養老金的百分之五十，讓這群長者能有尊嚴地渡過餘年呢？
所謂「肉食者鄙」，毛澤東都講過「卑賤者最聰明，高貴者愚蠢」，咁講可能反智咗Ｄ，但係自古以來，當官醒的，真係唔多。古時有個皇帝，有人話佢聽人民無飯食，佢就話「何不食肉靡？」就等於現在人話，屋企無錢開飯就上酒樓食一樣咁過癮。所以當官的講Ｄ食塞米說話「又係好正常」。
只係，特首講咗唔算數，明明公開應承咗，但轉頭又話要諮詢，起碼諮詢到出年，但被問到時，佢又話只要有共識，唔排除明年可以提早實施。咁係唔係又出彈弓手？四月份話接納民間訴求，即係都應該算係共識啦，到十月份就話要再等共識，咁即係點？究竟乜野先算係政府接受的社會共識？翻手為雲，覆手為雨，只能惹起更大民憤。
對此問題，民間社會簽名運動又發動過而且響應熱烈，議員、各個社團又不斷呼籲調低養老金年齡，電台「烽煙」節目都講唔少，咁唔算係共識，點至係。民主新突然靈光一現，啊，十二月二十日，特區八周年紀念日，一群數以萬計的長者齊齊上街示威，打正旗號要求將養老金年齡下調至六十歲，要求增加長者津貼，咁可以視為社會共識了嗎？明年一月一日就調低養老金發放年齡、調高攞唔到養老金的長者的長者津貼，可以嗎？
特區政府及行政長官，真的需要一萬幾千名長者在八周年回歸紀念日冒著寒風上街才能令你哋下定決心嗎？
文章定位：
