唔知由幾時開始，我既新聞台都係講電影，今次都唔例外，我係想對我過去一周睇過既戲作一啲回顧。
第一套係《炮製女朋友》，老實講，一聽個戲名，你唔講我都可以話到你知佢想講咩、點樣拍，但作為一部消磨時間既戲都發揮到佢既作用。第二套係《我的野蠻同學》，雖然都係無咩驚喜，但係睇睇下覺得佢拍到有啲似武俠片，尤其是打交個幾場既slow motion，睇落都幾得意，整體嚟講唔算太差。跟住既係《大逃殺》，想睇好耐但又唔係好敢睇既一套，話哂都係日本電影界既殿堂級導演深作欣二既作品，仲加埋北野武做個老師，唔睇有d對唔住自己。整體都幾血腥，但睇咗唔係好驚個隻，而係有淡淡既哀愁係裏面，當人與人之間為生存而互相撕殺既話，呢個世界都幾慘。
第四套就睇番d輕鬆既戲，《特警新人類２》，我覺得第一套好睇d，d打交戲好睇過第２集，同埋呢集其實可以當西片睇，因為佢七成對白都係講英文，不得不提既係黃秋生，佢搞笑又得，變態又得，做忠好睇，做奸又似，果然係有實力。
跟住又睇咗想睇好耐既《當老鼠愛上貓》，但都係好普通，仲有少少悶，華仔都係唔係太啱做古裝，套戲點解話有教育意義我都唔係好明白。
跟住個套我諗我一世都唔會忘記，呢套就係《受難曲》，作為一個鐘意睇戲既人，呢套片既音響、畫面同氣氛都做得好好，令人好似係耶穌受難個日在場咁。作為一個基督徒，我一路睇一路喊，個心仲好痛tim，原來神愛人可以愛到咁盡架，我睇完有好多反思同醒覺，雖然d鏡頭係好多血，但我相信以當時猶太人咁憎恨耶穌，佢地可能對耶穌既歐打係咁犀利。
跟住個套係《月亮的秘密》，呢套係繼《受難曲》之後最好睇，係講三個女仔都係網上面識既，咁三個都同時愛上兩個男人，之後佢地點樣係情路上選擇自己所愛既，好有意思，佢有句對白係講「是愛使我們相聚在一起」，睇完令我有一種好sweet既感覺。
之後既係鞏莉既《周漁的火車》，睇完都唔係好明，但都可以話係一套藝術片，鞏莉真係幾靚，好有氣質，但佢既愛情係好多灰色既感覺，睇完唔係咁開心。最後一套係三級片，叫《快樂到死》，話就話係三級片，佢既性愛鏡頭都好大胆，但男女主角都好靚，佢唔算係一套好唯美個隻三級，但有唔係色情個種，有d令我諗起現實生活裏既人點解會偷情，可能你偷情既情人唔係同你一齊生活，你唔會睇到佢最真實既一面，所以係特別令人有幻想，睇完令我d唔知點既感覺。
睇咗咁多戲，都係因為我呢期太得閒，同埋我嚟緊要作一篇小說，唔佑大家有無好題材俾我參考下呢？
文章定位：
