泰遊記
12日既凌晨4點就起左伸,因為要搭早機,執好行李後就出發搭的士到機場,因為天未光,到機場都無咩人,等下坐下咁,一團人就跟住離境,一輪手續後好快就要到登機閘,嘩,原來行禁遠,唔怪得機場要咁大啦,上機了,因為團費平,我地都係搭好cheap既泰國機,媽媽話仲差過十幾年前搭果D,事實上D位又好迫,我都唔理啦,第一次有得我搭都開心架啦,其實又唔係太興奮,好似搭巴士咁囉,泰國空姐都幾靚架,媽又笠左報紙睇,一大早就有我個偶像,成版呀.
飛機準備起飛了,行左都好耐下,升果陣就好快囉,都幾好玩架,之後食下飛機餐,都過左大半時間,然後同爸換左窗口位,果陣就到,所以睇倒泰國D屋,一排排,好似積木,D雲又一舊舊咁,好靚,睇睇下都落機了,搭左兩個鐘都覺得悶.
到左泰國,又一輪入境手續,等行李又等左半個鐘,泰國比香港慢1個鍾,所以都係11點倒,之後搭旅遊巴去第一個境點...
咩遊樂場之類,類似海洋公園咁啦,因為忘記著件tee,so熱爆左,換返即刻爽曬,玩左咩呢...係無架,影下相,行下,食下野,好累...下一站去...唔記得左,夜晚睇人妖show,去泰國必做,有D真係好靚,有D依然好似男人,不過佢地D衫著左等於無著,唔係咁鍾意囉,佢地假架嗎,好似好侮辱女性咁..之後就到酒店,沿途經過一條類似廟街的地方,好熱鬧,因太眼訓,又遠,都無再行返出黎逛了.
第二日
就去芭提雅,都坐兩個鐘車先到,成架車D人都訓左,去到又係食,每餐都一定有魚蛋,當然同香港唔同,都唔係太辣,食得多都慣左.去老虎樂園,當然同老虎仔影相,嚇死我,佢D皮好吉,又郁喎,好驚,好彩張相影得幾好,一路睇,一隻超級肥豬,老虎仔係飲豬奶架,仲有一隻惡過老虎同豬既狗,幾千條唔郁既鱷魚,爸爸一度認為係假架,幾個細路同豬賽跑,哈~都幾搞笑...
去騎大象,喲,好臭呢,上左隻象就覺得好玩,搖得好勁架,哈,個泰仔有時又整到隻象行得好快,'登'死我...
之後真係又唔記得左了,算啦,唔順序講啦,記起咩就講咩啦.
跟團唯一既特點就係帶你去D舖聽人sale野,今次去左蜂蜜,植物,皮具,燕窩,蛇藥店等,無聊得很.
返左酒店執好野後就去左行一間大百貨公司-Mike,其實話D野平,係平呀,不過無款,間levis好細間,本來想執返幾條,但都睇唔岩,行完出去街買野食,食左兩個翅,四個燕窩都係千幾匹(除5=港幣),都唔錯架,返到酒店又開始執野,已經煩緊個ʒ唔夠裝啦.
第三日
今日出海呀,十世未去過海灘啦,上次咪去赤柱燒野食囉,我又唔識游水,更加唔會去啦,一早就搭旅遊車出發,首先搭小遊艇去玩降落傘,哈,超好玩,我仲因為個船家比唔倒我降落又玩多個圈,好正呀,有少少愛上個海(雖然都係唔識游水),玩完又飛遊艇到珊瑚島,飛左十幾分鐘,大家都好暈...
珊瑚島其實唔係超級靚,但都係一個好既地方,海灘後面一排排沙灘椅,後面就係賣紀念品既舖頭,沙灘好長,所以都無行曬.同媽玩左水上電單車,我獱呀,哈哈,唔覺意禁大力左,就會開得好快,又驚開得快會反車...嚮海中心,D水就嚮腳邊,好得意呀~返上岸就游下水(其實係浸水),好舒服,真係後悔細路果時唔學呀~
玩完就嚮後面既地方吃午飯,又係玉子豆腐,原來泰國人都鍾意~
中午又飛遊艇離開珊瑚島,返酒店休息下,訓下,即刻覺得呢種只有食,訓,玩既生活好岩我...
大概4點又集合,今次係泰式按摩,一間房十幾個人排住咁訓,d燈又好柔和,跟住泰妹就入黎啦,好攪笑,之前個導遊話如果大力D泰文就叫'包包',如果好痛呢,有人就話'哎呀'(好笑),係啦,一聽就知啦...
之前睇D相係唔知點拗個人,好驚啦我,平時唔做運動,咪好痛...不過佢會幫你按完先拗你個人,手手腳腳都比佢"啪"完,最後真係好似拱橋咁...差D笑死我
夜晚都係去返Mike度行,媽就去左做Spa,我地就行下街邊,爸買左幾20蚊件 tee,有曬大大個Thailand嚮心口果D呢...四圍行下咁,之後返酒店就訓了,媽做完Spa 12點先返,果陣我已經熟睡了...
第四日
呢日一早起伸執行李,已經多左一個大背包.吃完早餐後準備離開芭提雅,一路上就係去左果d蜂蜜店,中午飯到了一間大飯店吃,那裡的waiter係踩住roller傳菜的,勁~可能因為海潚影響,全飯店得我地呢團人,好冷清,其實果度好中國式,幾靚,又有個人表演由山頂拉住吊覽滑落黎傳菜,好勁架...
繼續出曼谷既車程,入到市區,先去左燕窩店,當然又吃啦,不過無買,因為去過既人都話唔抵買,逗留左半個鐘就出返黎,見倒一檔街邊小吃,好得意的,有好多種料,佢將D料放入個膠袋撈,係咁撈,就咁一袋賣,個袋就好似裝金魚既袋咁...
上返車,無聊地搭左1分鐘車又落車,今次係皮甲廠,有鱷魚,大象皮...仲有魔鬼魚皮,係好令,同埋中間會特別漸變左白色,but之後在商場見得太多,我懷疑係畫上去的...
好了,我諗終於到市中心,先先去拜四面彿,話說四面彿咁多人信,其實有段故...係咁既(我竟然仲記得)...30年一個女仔去拜四面彿,佢求希望可以入大學,如果靈驗就會嚮度跳脫衣舞,願望真係實現左,但個女仔忘記左諾言,自些佢就瘋瘋癲癲,於是佢媽媽就記起當時既承諾,一個晚上,佢同個女仔去到四面彿前,四周圍住布,女仔就跳起脫衣舞,咁先無事,呢件事當時報紙都有登,所以傳開,四面彿係好靈驗的...
爸爸買左d香去拜,我地只係求下身體健康咁...
其實泰國係一個信彿既國家,每一家門口都一定有一座小彿廟,就算獱電單車的,佢地停嚮紅綠燈,都會向住坐四面彿廟拜,真的好誠心.
呢段係自由行時間,so我地去左行街,曼谷真的好先進,馬路,大廈都好大好靚,LV等名店都嚮呢區.入左一間叫Word Trade既購物城,大過又一城,不貴D野都唔平,可能遊客區啦.
想買adidas果d又無咩款,都係無買野,返而去吃左小食,行到腳仔軟.
夜晚我地就集合了,到了一個新開的跳蚤市場,環境不錯呀,一落車就開始搵野食,一個露天茶座,前面一個大舞台,左邊酒吧區,右邊小吃區,我地行曬有咩食先捨得坐低,太正啦...魚蛋麵,腸,飯,咩都齊,媽見一檔有個人中下中下,就好好奇,叫左一碟吃,芽菜,蕃茄,雜菜,蟹仔,加埋個醬汁,好有泰國風味...芒果糯米飯,今日先食倒,特產真係特別好食,甜既芒果,加甜既糯米飯...真係好正!
揀完野食,就慢慢坐低嘆,一邊睇住表演,一邊吃住食物,啊~,真係人生一大享受~吃飽當然係行下啦,一個禁大既跳蚤市場,有好多有特色既民族東東,睇下逛下,心情愉快!
今晚好早就返左酒店,都未盡慶,於是就同埋D團友到附近行,喔,好多關左門,可能唔係旺區啦,當散步,街邊都有D檔擺賣野食,不過都係當地人吃宵夜,入左間7-11,買左幾支泰版益力多,本身買左本有周生既泰雜誌,但我留左嚮酒店(傷心)...
又一天過去.
第五日
呢日上機前都係自由時間,pack好東東後我地搭的士去市區再行過,搭左大概30分鐘,都係十幾蚊,勁抵,去左Word Trade對面既Big C行,又去一條地下街行,我買左條充滿泰國特式的粉紅色褲,哈~好開心,好過要levis啦~
一直行,又同泰版麥當勞叔叔合照,開心死我~
不過當回程之際,麻煩的事發生了,我地拎左張酒店既英文地址,無拎泰版,好多的士事機唔識英文,好彩搵倒一個,上左車後佢問我野,我就答下佢,佢見我聽得明,開始叫我去D店睇下先,然後車費免,哼,我話唔去啦,比佢趕落車囉,勁賤,好彩無要的士錢,爸媽就開始驚起來,好彩之後搵個後生既的士事機佢識,安全地送我地返去,真係有驚無險!
同返個導遊講,佢話其實好少呢類衰既人,都係我地黑仔啦.|||
之後同我地同其他兩個團友去左食下午果餐,最後一餐了~~~
哈,其實都係酒店對面,少辣既飯,Å,食左五六碟,一人一支野飲,之後導遊又黎埋,七個人都係吃左五百匹左右,超平~
泰國真係可以食得好豪架~
五日之旅完了,乘車到機場,真係有點唔捨得,呢個時候導遊話泰航例牌delay,喔,佢試過delay 8個鐘...|||,點知真係,好彩只係1個鐘,哈,有時間閒逛機場,睇下飛機升降."
上機了,又係難吃飛機餐,悶,就到香港之際,唔知係咪氣流,拋左好耐,我又唔係咩事,出面閃下閃下,又黑,好驚架嗎(其實幾好玩,離心力好似過山車咁),哈,無野啦,安住降落~喔返去香港了
講真搭飛機除左升同降,其餘時間都係.......悶.
可能新年,返黎既香港人大把,禁區好似返大陸咁,即刻無曬feel...
拎埋行李就返家了,已經係凌晨1:00
今次既旅程都唔錯,令我好想再去其他地方,台灣(勁想去),媽媽都話下年去...日本,佢想左好耐,但一家人去就唔捨得了,太貴,況且我都無咩興趣,可能電視介紹太多了,唔去都知道有D咩...歐洲啦,將來一定要去,呵呵,諗都開心,咁就要努力儲錢了~
文章定位：
