*註:是此日記只適合女性或男性對胸圍有興趣或變態心理存在者觀看
朋友們(女性),大家有冇發覺係香港買bra真係貴得很?
一個wacoal分分鐘都要200-300蚊個,平平地買個cheap野都百幾蚊起,
仲有bra愈大size愈貴,而且B CUP以上既Bra有時款同貨都幾缺少下~
買bra,好多人首選就係泰國,當然唔係叫你為左一個bra飛去泰國買咁搞笑,
係去開泰國就買好多bra番香港,個度買wacoal只係香港既1/3價錢,
大約都係80幾蚊個,唔買多幾個,邊對得住自己!
上年去泰國,入手只得兩個,蝕呀!搞到依家唔夠brabra用!
冇得再去泰國就係香港等特買場,首選係SOGO 9樓既特買場,
好多時個度都有BRA BRA大特買,時間係大約係聖誕至新年左右,
係個度買個CK BRA,抵!80蚊左右1個,比起正價大約都係1/3價錢~
又係個句:"唔買多幾個,邊對得住自己!"
買買埋埋,Bra的確好似買左好多,但係會舊,會殘,會鬆呀嘛,
所以就要入新貨!對!今個日記就係同大家談討下Bra呢個問題~
我就係咁師奶鍾意講呢d野,你唔鍾意睇就走啦~哈哈哈!冇人要留你~
而且我唔係係度吹噓我身材有幾好同幾正,自認一D都唔好唔正,唔使有幻想!
朋友們,你地鍾意咩款既brabra?內藏鐵線的喜歡嗎?
有好多人都唔鍾意,厭鐵線頂住晒,但係唔係要頂先托得起?
依家唔托,老年先黎托?到時老年,個胸都跌到落肚腩lu~
不過頂住又真係唔係好舒服既~有點辛苦,有時我畀D鐵線整到好痛,
有條痕,定係個BRA太緊?!總之試過帶BRA帶到胃痛,一除低個BRA就唔痛wor~
肩帶呢?最近喜歡背後交叉那種,正確d黎講,一向都好鍾意可以甩帶既bra~
好方便wor!你鍾意點放條帶都得,唔用又得,著咩衫就用咩方法帶肩帶,
最近因為郁動多,普通既肩帶帶法,好易甩帶,背後cross不錯啊~唔易甩,
但係除番個bra出黎就係一個問題,講明唔易甩,你估易除咩......
唔信?你自己拎個可以甩帶既bra,試下back cross咁帶~
先前講完SOGO特賣場有BRA買,其實有好多大型百貨公司都會成日搞呢D特賣場,
荃灣千色店係經常性有!上星期行過又入手,不過千色店搞既特賣場好少係名牌,
多數都係唔多出名既本地牌子,不過要留意質料同款,帶壞自己就唔好啦~
今次買呢個牌子好耐之前有用過,唔好認為我淨係用名牌,
雖然的確係.....個個BRA唔係CK就WACOAL,但係大家要明白,
個D BRA全部都係80蚊左右一個,講左,唔買多幾個,邊對得住自己,你話係咪?
有時名牌都唔係好好帶呀咋wor~今次入手個幾個bra感覺不錯,幾好帶,
我覺得仲好用過CK個d BRA.....我是說真的~
而且今次新入手既BRA都係30蚊個,咁平,邊到有?!
女人街都有!?但係我係百貨公司買呀wor~
話說當日我買bra個時都幾辛苦下.....辛苦在要搵自己個size,
個攤位A CUP最多,B CUP已經算少,可況我要搵既係......C CUP
係個攤架到係咁搵,好辛苦先搵到我個size,我就咁放左係一邊,
有個師奶聲都唔聲就拎走左,我見到就話:"小姐,唔好意思......"
我未講完,個個咁既師奶就話:"我又唔係搶走你既,拎黎睇下之嘛,
咁大,我都帶唔到啦~"
我同佢講就係叫佢做小姐,但係佢係一個帶住一個大約8歲大既男孩,
同好有師奶樣既師奶。佢咁講完句野,我真係好無奈,
佢係讚我定彈緊我,家陣我揀個BRA好大咩?!定係對於你黎講好大呀?
師奶,你摸完又篤個BRA,我仲要買呀!我叫你都係唔想你搞je,
我夠唔知你係咪想買呢個BRA,你個款十足搶走人個BRA咁,
我都係話唔好意思je,都未講晒~
佢咁講完,我就話:"下面有d細d size呀~"個時我講呢句野係冇心冇意,
只係想話佢知有d冇咁大,可能0岩佢帶,但係之後我發覺原來我句野好有意思,
句野其實係彈緊佢胸細,實際,我估佢個胸真係細到得33A左右,
生過仔都係咁話,佢平胸嘛~
最搞笑係佢竟然拎住幾個BRA問個仔:"阿仔呀,邊隻色靚?"
小朋友都係咁話啦,佢點都係男仔,你咁問佢,好似搞笑左D,
阿仔答得仲威,佢話:"我唔識呢D野,唔識答"
個師奶阿媽又問多次,阿仔又話唔識答,師奶開始發火叫佢答咩色靚就得,
好明顯個仔係唔想答,仲迫佢做咩?阿仔係威迫之下,佢走左去睇玩具,聰明!
我那個size的bra的確好難搵到,搵到一個,搵唔到第2款有呢個size,
個sales就話:"呢個都0岩你啦~"一看,甚麼?!38B?!傻呀?
38wor!邊0岩?!CUP都唔0岩啦,B CUP~SALES話得,我就信下佢,
橫掂有得唔0岩就換,而且個個款係豹紋呀!我喜歡的呢~
番到屋企試下,真係唔0岩,係太細,竟然係細,CUP問題,B根本唔0岩~
第2日我拎左去換,SALES問我個BRA係太細定太大,我答太細,
佢就話:"咁我換大一個碼畀你"個時心諗:"下?!你換個40B畀我呀?傻呀?"
佢拎左我手上個BRA望望,佢都呆左,我諗佢都有諗係咪換40B畀我,
佢望住我個胸一陣,我就話:"唔係38太細,係CUP問題,我係要36C"
搞左一陣,換左第2個款既36C,唉~豹紋,無緣了......傷心~
有時覺得D SALES都幾是但,人家係36C,佢叫人買個34B,一係就畀個38B人,
D碼數亂黎呀?C同B有分別呀wor!你畀個34C叫我較最鬆我都信呀,
你畀個34B我真係搞笑左D......38B睇落同36C好似差不多,
原來D野真係要試過晒先知好唔好~
記得某次同JAN JAN,凱盈去買CK既BRA, CK既SALES問我要咩SIZE,
我答左之後JAN JAN拉住我隻手叫我唔好咁大聲講要咩SIZE,
我就話:"呢度咁嘈,唔大聲D佢點聽到?我唔想講多次要咩SIZE呀~"
JAN JAN話:"但係你隔離個女人要32A,佢聽到你咁講即刻呆左望住你呀~"
我:"由得佢啦~我都係講事實,唔通我報細數?帶壞我呀!"
文章定位：
