一條尼龍索仔，兩te3 圓圓圓的塑膠片仔，就會tang3予 陣囝仔袂輸是去予魔神仔迷著仝款。啥，欲問我是啥mih仔遐爾好sng2哦？就是sng2法有na7百款，人人叫伊是「溜溜球」的mih仔啦。較早的囝仔ki2指若無結一粒仔「溜溜球」來一下仔chhoa7狗散步，是欲按怎佇學校抑是庄仔頭佮人徛起？若是佇庄裡抑是學校tu2-tioh8伴，手裡的索仔弄(lang7 )咧弄咧，土跤迄兩隻狗仔觸(tak )起來就會哦！『弄狗相咬』這種代誌對阮來講袂輸是桌頂拈(ni )柑咧，輕輕鬆鬆啦！
看到這兩年來，台灣引進日本bang2-ka3。逐(tak8 )禮拜攏會佇電視台咧放送，予這項屬於阮迄的年代的mih 仔koh 再hit -touh起--來，而且，koh新的bang2 -ka3內底koh 加入了真濟新的現代科技，乎「溜溜球」轉--起-來會tang3較緊(kin2 )，而且較久。
佇我印象中，差不多是佇1990年迄跤踏仔，我第一遍接觸到這種mih 件。毌taN7是我，koh有迄當陣所看的到的查甫囝仔，人人的手攏吊一粒。上kai3 chhia 樣的算做是可口可樂公司出品的「魔鬼系列」。迄當時除了開錢用買的，若有想欲愛迄款品排的「溜溜球」？會tang3收集可口可樂的蓋去佮可口可樂公司換，口可樂公司這個促銷的方案對迄當陣逐日干taN7有一、二拾塊銀角仔的散鄉囝仔朋友來講，算講是有食擱有掠、一面摸蛤仔兼予汝通洗褲的大放送。毌koh，一直到我較大漢的時，世事有略(lioh8 )仔較捌的時，我才知影收集氣水罐仔蓋的活動就親像咧chhoe7藏寶圖仝款，永遠嘛是欠一份。(最少阮遐無人捌得彩過！)欲早若知就boai3飲遐爾濟的可樂抑是氣水，氣水愈飲是愈加添腹內的『氣』水。Kui腹肚『氣』水無teh通消，有影是會漲(tiuN3 )破腸仔肚哦！
『魔鬼系列』總共有紅、黃、綠、藍四款四款，講較白咧，其實是色水無仝nia5 ，製作上應該無啥mih 無仝，但是，逐家攏嘛假gau5講to2 一款較厲害、to2一款才是天霸王 ，這陣ka7 想起來真是有影好笑。佇迄當陣，柑仔店逐日攏會提出新開的內面裝「溜溜球」的盒仔出來排，若是手腳無較緊咧，liam mi就去予人搶了了。
佇迄當陣，小弟我為著欲拿到四款，想孔想縫(phang7 )，最後將腦筋動ui3父仔母的皮包內底。做khun3就偷提父母下生命所趁(than3 )的兩百箍，tu2-tu2仔好買四粒。轉來到厝裡，掩掩藏藏抑是匿(bih )袂過兩百箍生跤偷走的代誌，阮老父是氣kah ：「細漢挽匏(pu5 )；大漢偷牽牛」伊是一句罵過一句。我想講奇怪，我是偷提兩百箍啊，伊na2會誣賴我偷挽匏？我無偷挽匏啊！伊na2會講我大漢會偷牛?
無代，我按呢講了後伊煞唸我講我不受教，做歹koh敢應嘴應舌。連講幾na7個白賊攏hong7伊ka7 我thuh -thuh破，只好實話實講囉！siang2知影講實話的所換來的是一頓粗飽的竹筍炒肉絲。我迄陣誠僥疑？是按怎樣老師佇學校教的佮阮生活上的攏無相siang5 ?，為啥mih迄個美國總統講實話的時in老父會ka7 呵咾(o-lo2 )，我咧！我就愛去予人拍kah半相死？
流行的程度排佇咧『魔鬼系列』後壁的，是另外一種毌知影to2一個公司出品的，非常大粒，一邊紅，一邊藍，上特別的是，這款「溜溜球」內底會tang3 下電池。恁ka7 聽--起-來可能無啥大不了的，因為現在teh流行的、新的「溜溜球」內底嘛攏會tang3下電池，毌過後面迄句恁to7 聽予詳細neh 。我所講的電池是”三號仔”，毌是水銀電池，而且是愛兩邊攏鬥(tau3 )。講到chia 應該就破真明啊！這種「溜溜球」的吋尺講有偌大就有偌大，甚至會tang3講是「溜溜球之王」。佇日時sng2這粒「溜溜球」，可能看袂出來伊奇巧(kha2 )的所在，但是若是佇暗時不嘿嘿！代誌就無遐爾簡單囉。電火禁掉，索仔一放，水就是水啦！元宵節放的炮仔就毌知有伊的一半水無？伊內底的細粒電火球仔會因為離心力的緣故來khap tioh開關，佇暗mi bong當中，看著一葩細細的光咧轉箍碾(lin3 )仔，真正是使人歡喜的一層代誌。
有關這粒傳說中的「溜溜球」，欲得著的方式有幾na7種講法，有人講，真簡單就會tang3買到，一粒嘛干taN7 20元nia5 。有人講，這是廠商做出來送予柑仔店的產品，無咧賣啦，除非你佮店頭有熟識。看起來，這粒「溜溜球」佇大家的印象中真正是足深的。
會記咧我迄當陣為著這粒「溜溜球」，心肝掠坦橫。提兩粒『魔鬼系列』中的「紅魔鬼」和「黃魔鬼」去佮人交換，予我心痛幾na7工。總算是提到這粒「溜溜球之王」，但是，世間若是萬項攏順咱的意，世間就無叫做世間仔！這款內底有電子儀器的mih 仔，那會堪得囝仔按呢tng3按呢摔？無幾工的功夫，這個我心目中的霸王就佇伊身軀破做koeh8,悽慘的情形下，正式佮我相辭。
現在，看到我的外甥咧sng2 「溜溜球」，毌na7有光，koh有音樂，外型koh 做了水噹噹。我袂擋的ka7借來sng2看mai7 ，表現幾步仔我還袂放袂記得的步術予鼻芳咧，他看kah嘴仔裂獅獅，kou-chian5我ka7伊教，我一步一項講予聽，佇這個時陣，迄個足久無見面的老朋友na2像koh 佇我的面頭前teh轉。「行！我koh chhoa7 汝來外面散步行行看看咧！」
文章定位：
