告訴我 每天都要讓自己大笑三聲．．．．有益身體健康唷！！！！

14,408愛的鼓勵 39訂閱站台

刊載於「海翁台語文學雜誌」第148期（2014.04）p.73

 

古詩內面講，清明時節雨紛紛，路上行人欲斷魂……。

 

現代因為溫室效應，全球氣候發生重大變遷，這臺灣農民曆裡的節氣「清明」，在近代某一位偉大人物過往了後，已改成全民放假培墓的國家節日了。

 

因此，清明時節是毋是有雨紛紛的詩意著愛看運氣，無定著是一个日頭赤炎炎曝人乾，著沙魂斷墓埔的日子嘛是無一定啦！

 

老大人有交代：「清明是活節。」因此，培墓或者是做節無一定愛對「清明」這一仝。

 

近來政府推動公墓公園化，一向被稱呼做「三重埔」的九如墓埔，特別選定全國百姓攏歇睏的禮拜日，開啟骨灰存放的空間，舉辦清明祭祀。

 

一早起家家戶戶就準備了三牲五禮，鮮花素果以及豐盛酒菜，金銀紙料前來「準備」欲祭拜。

 

是按怎哪會講：「準備」呢？

 

古早人歸世人毋捌行出家己生長的庄頭外，因此任何婚喪喜慶，家己兄弟宗族攏是一呼百應，仝行仝命叫作掠賊拍虎親兄弟。

 

如今社會轉型，仝宗族的兄弟毋但各自離鄉背井出外為生活拍拚，甚至佇外地成家立業，這清明培墓變成春節元宵以後，親族再一次聚會的重要時刻。

 

前一仝來到九如公墓的時陣，廣場頂面已經是滿滿的祭拜祖先的孝子閒孫，彼爿是三叔公這爿是九嬸婆，逐家攀親引故互相咧招呼問好，哪有啥是「路上行人欲斷魂」？真正無比年節見面彼種鬧熱有較差！

 

親朋團聚是歡喜是好事，但是歡喜歸歡喜，偏偏口角溜出來的言語，卻是酸辣甲使人聽著親象去卡著耳空毛彼一般。

 

「財哥啊！哪會遮早來啊！恁老細仔猶未看見你著先來拜矣？」

 

「無提早拜那會直？序大人在生無食素，伊每擺攏簡單拜果子，是欲叫序大人哪食會飽？」

 

哇咧？人往生了後也著愛靠陽世囝孫的祭拜才袂餓腹肚啊？

 

講咧講咧，這家的小弟真正提著一籃水果來到現場。

 

當水果排上供桌頂，這小弟燒香當欲祭拜的時陣，這做大兄的又閣講話：「你先入去內面呼請阿爹、阿母出來用啊！」

 

這……這是啥禮數啊？愛先入去內面去請祖先出來用餐？內面除了奉金甕以外嘛奉金甕啊！去「呼請」啥人啊？

 

這陣兄嫂嘛開喙講：「恁某哪無佮你做伙來？」

 

「昨暝輪大夜班，閣咧睏啦！」

 

「咧睏？遮好命……彼若伊後頭，規暝無睏嘛攏無要緊啦……」

 

「你咧厚話啥啦？嫁出的哪有人轉去後頭培墓呀！人好命咧睏管你啥底代？」這大兄聲頭落（láu）真懸口氣嘛無界好。

 

唉！真正是清明時節「語」紛紛啊！一人一家代，公媽隨人拜，這哪有啥好講的呢？

 

刊載於「海翁台語文學雜誌」第148期（2014.04）p.73