告訴我 每天都要讓自己大笑三聲．．．．有益身體健康唷！！！！

14,408愛的鼓勵 39訂閱站台

「清明」佮「清明節」有相仝無？

 

「清明」是節氣，「清明節」是節日，兩个無相仝！

 

自古以來農民依天氣氣候，計算日子的曆法一般叫作農民曆。到甲中華民國出現，農民曆變作舊曆，日子是按照西洋曆法計算的叫做「國曆」，嘛有人講是「新曆」。

 

咱的祖先真有智慧，以十五工月缺月圓號一个「節氣」，一年有二十四个「節氣」。所以一年有三百六十工，每三年有一閏，所以計算起來佮西洋的一年三百六十五工，四年一閏是符合的。

 

中國的農民曆依天氣變化定日，用佇農民種作，比較起來比西洋的曆法更加準確。

 

「驚蟄」過十五工是「春分」，這陣是春天囉。

 

「春分」過十五工是「清明」，春天草木復生百花全開，春雷響了農民開始種作，閣過十五工是「穀雨」拄好潑水。

 

「春分」了後，百木花草開始生長，當然祖先的墓頭嘛是雜草叢生呀！所以這陣囝孫仔愛來掃墓，刈草整理墓頭。

 

咱的祖先是毋是蓋有智慧？這攏是經驗的粒積所來的智慧。

 

到甲蔣介石亡故，彼工拄好是國曆四月初五，閣真拄好是農曆的「清明」。

 

第二年，國曆四月初五比農曆的「清明」早一仝，但是政府明訂四月初五為為「清明節」同時是「蔣公逝世紀念日」，全國歇睏一工去掃墓。

 

但是相離譜的是，有人偷改農民曆的「清明」來合國曆四月初五的「清明節」！因此，彼年的農民曆有兩个版本！但是彼本「清明」合國曆四月初五的「清明節」的版本被當作正確的版本，用現在的語言來講，叫作「官方版本」。

 

從此以後每一年，那掀開農民曆來看，「清明」一定是國曆四月初五。也是唯彼年開始，農民曆就失去準確性。

 

所以現代人時常講，氣候變化「天無照甲子」，其實認真檢討起來是「人無照天理」在先。

 

▓

 

介之推又擱是誰呢？

 

相傳春秋時代，晉文公重耳有一位忠心的臣子，一直綴晉文公重耳四界奔波。甚至曾經刈跤肚肉予晉文公重耳止饑！

 

所以晉文公重耳講：「有一工我那登基大寶，一定會重重封賞這位介之推。」

 

那知有一工，晉文公重耳在秦穆公幫助之下，終於成為一國之君！

 

當有一工，晉文公重耳挾一塊豬跤箍欲食的時陣，雄雄才去想著十九年前，曾經刈跤肚肉予伊止饑的介之推！

 

但是這陣的介之推因為無受到誥封，揹著老母鬱卒穩居在深山林內，拍算無欲閣佮晉文公重耳見面。

 

晉文公重耳為著表示誠意，就率領御林軍入深山找揣。

 

可是山高路險，安那揣嘛揣袂著。有人建議放火燒山，親像在燒野獸彼一般，逼介之推出來。

 

大火燒了三暝三日，樹木燒甲冇半叢，本來青翠的山嶺變成遍野的灰燼。

 

晉文公又派人找揣，終於發現介之推揹著因老母，燒死因佇一叢大樹邊。

 

晉文公下令全國，在介之推燒死的彼工，全國的灶空袂當起火，家家戶戶攏食焦糧、冷飯配涼水，表示紀念。

 

這工拄好是農曆三月初三，所以這工叫作「三日節」嘛有人講是「寒食節」。

 

▓

 

若安呢，介之推佮清明有啥關係？

 

三日節袂當起火煮熟物食，這陣祖先又閣發揮「有毛食甲棕簑，無毛食甲秤錘。」的智慧，前一工就做好潤餅皮，這工袂當起火就包潤餅食。

 

「清明」拄好佇底農曆的三月初，所以「清明」有時陣拄好是三日節這工。

 

清明囝孫培墓一定愛準備三牲四禮，袂當起火煮飯菜欲按怎？

 

干但用潤餅培墓是無可能的代誌，所以清明這工照常起火煮飯菜。何況「袂當起火」是你晉文公重耳講的，這陣啥時代啊？莫講晉文公是誰，重耳時誰？已經冇人捌伊！是安怎三日節愛食潤餅嘛無人知！

 

現代人只知影，清明愛食潤餅佮愛掃墓，甚至干但知影這工是國定假日，會當歇一工！連這工是「蔣公逝世紀念日」應該嘛是無人知影才對！

 

▓

 

現代是死人佮活人爭地的時代，每年那清明掃墓不時發生，因為燒銀紙致使發生火燒山的代誌。

 

這親像當年晉文公放火燒山，但是彼陣放火燒山，燒死的是介之推以及因老母，這馬若火燒山是燒「死人」！

 

現代人提倡火化後供奉在金寶塔中，清淨佮省所在。

 

可能閣過幾年後，就無人會瞭解「清明掃墓」啥是意思？放假是放啥意思嘛無人知！

 

刊載於「海翁台語文學雜誌」第76期（2008.04），p.48。