圖片說明：臺灣糖業公司屏東總廠，宿舍區內被火燒過的洗衫仔店。
細漢彼時陣無人厝內有洗衫仔機，蓋濟好衫或者是制服攏愛送來洗衫店洗，因為這會當將衫褲熨甲挺閣平。
彼陣的廠內親象是一个小王國，有病院有戲院，有幼稚園嘛有小學。甚至有剃頭店以及腳踏車修理店、福利社、皮鞋修理店佮這間洗衫仔店。
洗衫仔店的頭家衫褲那洗好熨好，閣親身送來到厝，真方便。
彼陣毋捌看見查埔人家己咧洗衫褲，有家後的人攏家後咧洗，若欲看查埔人洗衫除了洗衫仔店以外，罕咧看會著。
洗衫仔店是日本時代就建造的木造建築物，頭前後璧攏整理甲像庭園彼跡一般。
漸漸逐家厝來有洗衫仔機了後，洗衫仔店生理就變穗，既然家己有洗衫仔機就免閣請人洗。
但是在某一種為著欲買「出人頭地」的某種原因之下，雖然家己有洗衣機免閣請人洗衫，但是變成家己的洗無夠，別人的煞洗來鬥。
時間來到民國七十年代。
彼陣，廠內升等升級已經到了白熱化與公開價數的地步。
因為歲月無情，遐的外省仔老的是老加袂哺塗豆，年齡嘛改幾落擺已經與實際差傷濟，閣改已經無人欲相信！
而且臺灣人寸進的嘛袂少，甚至已經有人做到小廠的廠長，準備欲來拚這位總廠長的寶座，趁彼咧公司行入末路進前閣趁一棟仔，通好以後坐咧食倒咧放。
彼陣已經有一條升等的順序產生，農場課長升小廠副廠長，然後升廠長，以後財有機會參加排隊拚總廠的副總廠場，最後才拚總廠長的地位。
每一處坎站攏有公開的價數以及管道，所以國際糖價如何？公司發展如何已經是其次，這陣自己前途較重要！已經「投資」落去，無論如何嘛愛有一个結果才會用的！
民國七十年代彼位總廠長歐某某某，伊有權嘛有管道會當安排人事，所以在伊在位彼十外年，廠內的爭權奪利非常的白熱化佮公開化。
原本平靜的宿舍區，變成鬧熱滾滾。
某小廠的廠長那退休，人員補位是牽動全臺灣，用地牛翻身來形容著無過份。
農場課長想欲佔小廠廠長的缺，農場課長的位嘛是有課內的股長咧數想。人講一粒菜頭佔一硿，欲佔硿閣毋是時到才咧走從，普通時著愛會曉鋪橋造路予人行才有效果。
因此，歐某某某因兜每晚攏燈火通明，遮的有寸進企圖心的課長，不時佇歐某某某的官邸宿舍出出入入，比轉去厝內看序大人閣較齊勻。
輸人毋輸陣，輸面歹看面，某人若出現另外彼爿的人馬接著消息，真緊著有人馬到位。
歐某某某一日三頓攏有人相爭安排，欲出門車輛隨到，除了三頓以外宵夜也免驚會食無。
除了查埔人的明爭以外，也閣有查某人的暗鬥插一跤。
人講成功的查埔人背後，一定有一个真好的內助，頭家是一廠之主，家後嘛呣是普通跤數。
明的是查埔人，暗的是家後對家後查某人的戰爭。
為著頭家的前途，遮的爭權奪利的查埔人伊背後的家後，不知不覺中嘛投入戰爭中間。
查埔人尚上驚嘛上愛查某人佇耳硿邊講細聲話，那有本事予歐某太太，在歐某某某的耳硿邊講兩句仔家己的好話，一切就順勢閣完滿前途著無限光明。
欲予歐某太太會當替咱講好話的工作，變成愛由自己的家後去進行，本成是查埔人的戰爭變成是查某人的戰鬥！
戰事發動了後，歐某太太變作家己免洗衫閣免款內面，外衫褲有人洗甚至內衫褲嘛有人搶欲洗。
食飯時間那到，就有人準備便便閣添好飯菜，只欠順紲飼到喙口而已！競爭的人濟，每日菜色變化嘛濟。
彼陣廠內的病院已經經營不善關門大吉，偏偏這陣真需要醫療設施！
尖跤幼秀的歐某太太，自從三頓佮家事有人處理了後，身體狀況煞來變歹！佇厝來有當時閣會行到跋倒，若小可予蠓仔踢著，遐的「高級婢婦」馬上著叫救護車，上懸記錄捌一日叫三擺以上。
彼那是真正愛入院，這聲就會當看著一群查埔人佇廠來走來走去，袂輸家己的序大人已經欲轉去彼一般！偏偏對家己的序人閣無遮友孝！
尚悲哀的狀況，突然間發生！
彼工，歐某某某佮蔗些孝子賢孫欲晚佇廠內散步。歐某某某突然間講，後個月伊就欲退休囉，新的總廠長後日會來交接！
這種天大地大的代誌拄好講出喙，現場馬上離開的有一半人以上。本成痀落欲幫歐某太太縛鞋帶仔彼位婢婦，隨站起來頭攏無越就隨離開去。
這陣人佮人中間現實的一面，馬上顯露出來，已經無巴結的價值就無需要巴結，只不過變面變了有較緊一寡，但是那徛在經濟效益的角度來看其實是正常啦。
新的總廠長後日若來，應該是另外一場巴結戰爭的開始！
歐某某某退休彼仝無人歡送，嘛無人鬥搬厝。毋過幸運的代誌是，歐某某某退休了後，歐某太太身體全變勇起來，幾落年來毋捌閣叫救護車，家己會曉洗衫嘛會曉煮三頓兼款內面。
只不過是，較早遐的高級婢婦那相遇煞變作無熟似而已。這其實無重要，因為應該款的攏已經款飽，現在是清靜享受的時間，不熟似顛倒快活。
彼年這棟木造的洗衫仔店，電線走火發生火警了後，一直無人處理。
彼仝轉來翕相看著這種情景，感覺蔗親象是一處的廢墟，親像糖業公司對興旺走入沒落，一步一步踏入消失的境界。
一个火災的現場，放佇赫濟年無法度處理的公司，沒落其實嘛是正常啦。
事實上，啥人有時間來處理這種無前途的代誌呢？
刊載於「海翁台語文學雜誌」第83期（2008.11），p.55。
文章定位：
