話咁快今個農曆年又過完，趣事都唔少：
1：今年新聞例牌又要講市民去黃大仙廟上頭注香的盛況。在場竟然有人戴泳鏡去上香．．．．．．．你唔好帶氧氣筒去？？咁怕煙就好心你唔好去啦陰公。
2：年初二放煙花，其中一幕個主題係麻將中的“筒子”．．．．．．．有無搞錯？下年不如整一幕十三么啦，十三粒一齊爆～ 嘩，香港一定好～
3：上年何局長親身證明o左完來去車公廟求簽原來係有“下簽”既，而且靈到你唔信。今年換o左劉村長去求得“中簽”。我諗，係咪做馬架？如果係下簽，一定又比人媽到飛起，如果係上簽，D人又會懷疑會唔會好得咁快呀?中簽似乎最見得人。唔得，下年我要戴泳鏡企o係隔離睇下班人有無出術先得。
4：今年新年D電視廣告真係悶到抽筋，D乜乜２萬８千８廣告套餐，個個廣告D音樂都一樣??。唔信你試下當佢去廣告時合埋隻眼去聽，你會以為電視告食帶，D音樂不斷repeat，其實新年音樂有好多架，點解係都要播個首呢？？
5：禽流感又開始爆發，佢又真係好似親戚來拜來咁，年年來一次，唯一唔同就係佢唔識派利是．．．．．．．咁就已經係一個好理由叫佢快D走啦！
6：香港人真無聊，前個排有一大班人個個唔返工去睇人捉條鱷魚仔。今年新年又一齊去睇馬騮，話應節喎。不過我而家先知原來馬騮係唔只食水果，仲識食薯片同飲氣水添。下次不如帶埋紅酒，壽司同Pizza比佢地啦笨。我想問其實班馬騮係咪班細路扮架???
7: 放幾日假一個人o係屋企,唔使出聲，到返工個日見到其他人，發現自己講野同諗野唔協調，好似有一次我明明想講”奶咀”，但個口好自然咁講”奶水”．．．．．．其他人仲以為我講衰野，樣衰到爆炸．．．．．．．我開始發現自己唔識講野既情況十分嚴重，要諗下辦法先得。
文章定位：
